Í janúar er allra veðra von.  Ég var búin að ráðgera ferð austur í dag og ætlaði að vera yfir helgina en nei, ónei.  Hellisheiðin hefur verið lokuð í allan dag og verður í fyrsta lagi rudd á morgun.  Í uppsveitunum er illfært samkv. upplýsingum vegagerðarinnar.  Jón hringdi í Sigurð bónda á fimmtudaginn og þá var 1/2 metra snjólag yfir öllu og síðan þá hefur kyngt niður snjó á þessu svæði.  Veðurfræðingur sagði að svona mikið hafi ekki snjóað í Reykjavík síðan 2000. 

Morgunblaðið í dag:

Í skóla einum í Vestur-Jórvíkurskíri á Englandi hafa allar barnabækur þar sem svín og grísir koma við sögu verið bannaðar.  Er það gert til að móðga ekki múslimsku börnin en múslímar líta á svín sem vanheilagar skepnur og er neysla á svínakjöti bönnuð meðal þeirra og raunar Gyðinga líka.    Annað mál af þessu tagi hefur verið á döfinni í héraðinu en til stendur að halda tónlistarhátíð barna í Kirklee í júní n.k.  Þar átti m.a. að setja upp söguna um Rauðhettu og um litlu grísina þrjá og úlfinn en aðstandendum hátíðarinnar hafði verið skipað að skipta út grísunum og láta þrjá litla hvolpa koma í staðinn.  Þegar hér var komið skarst hins vegar bæjarstjórnin í Kirklee í leikinn.  ,,Það er eitthvert óttalegt rugl í gangi," sagði Jim Dodds, talsmaður yfirvalda í menntamálum þegar hann tilkynnti að bannið við grísunum þremur hefði verið afturkallað.  ,,Grísirnir þrír verða á sínum stað á hátíðinni."                                          

24 stundir:

Lengi hefur gengið orðrómur um að rjóminn af handrukkarastétt landsins búi í Vogum á Vatnsleysuströnd og eiga þessir menn að halda sveitarfélaginu í ógnargreipum.  Íbúar þurfa þó að óttast fleira en hnúa og kylfur því Vogar er eitt fimm sveitarfélaga á landinu sem hafa enn ekki lýst sig kjarnorkuvopnalaust svæði samkvæmt vefsíðu Samtaka hernaðarandstæðinga.

Fréttablaðið:

Bæjaryfirvöld í Kópavogi greiddu grunnskólakennurum 18 þúsund króna eingreiðslu um  síðustu mánaðamót en öðrum láglaunastarfsmönnum bæjarins hlutfallslega meira.

Viðskiptaráðherra telur að sparnaður heimila vegna afnáms seðilgjalda verði á bilinu 20 til 50 þúsund króna á ári.  Á móti kemur að kostnaður vegna útskriftargjalda verður líklega á bilinu 20 til 50 þús. á ári.  Síminn og fleiri innheimta nú jafnhátt útskriftargjald í stað seðilgjalds.  Fyrir mig persónulega skiptir engu máli hvort viðbótargjaldið á reikningum kallast seðilgjald eða útskriftargjald.  Mér fannst samt þegar viðskiptaráðherra kynnti þessar nýju reglur að hann vildi að þessi gjöld féllu niður.  Datt honum aldrei í hug að nafnbreyting gæti átt sér stað og allt yrði í sama farinu.

Sá sýninguna Jesus Christ Superstar í Borgarleikhúsinu í gærkvöldi.  Útfærslan var að mörgu leyti sniðug og modern, t.d. síðasta kvöldmáltíðin er gerð að grillveislu og lærisveinarnir skella sér í heita pottinn.  Klæðnaður lýðsins er allt frá virðulegri buxnadragt til hins frjálslegasta hippaklæðnaðar.  Heródes er í teinóttum jakkafötum og Jesús sjálfur í leðurbuxum og prjónaðri mussu.  Söngurinn var góður og mikið rokk í sýningunni enda um rokkóperu að ræða.  Úrvals fólk sem þarna steig á svið en samt, já samt fannst mér vanta neistann og útgeislunina sem á að ná til salarins.  Mér fannst á stundum að leikgleðina vantaði, fólkið væri bara í vinnunni sinni og biði eftir að sýningunni lyki.  En ég skemmti mér engu að síður ágætlega.

Fyrir sýninguna hittist hópurinn á Kringlukránni og þar borðuðum við dýrindis máltíð.  Svo þegar ég kom heim var Desperate Housewifes einmitt að byrja í sjónvarpinu.

Nú er vælið í Vilhjálmi Egilssyni, formanni Samtaka atvinnulífsins hafið og fleiri í hans hópi taka undir, hér eftir nefndir þeir.  Honum finnst af og frá að hækka persónuafsláttinn, það kostar ríkissjóð 40 milljarða.  Miklu skynsamlegra að hans mati er að hækka launin um ,,góð 3%”.  Það á sem sagt að hjakka í sama farinu, kjarasamning eftir kjarasamning.  Góð 3% gera ekki einu sinni að halda í verðbólguna sem geisað hefur s.l. ár.  Þegar kennarar gerðu kröfur í  síðustu samningum fengum við að heyra að við værum að stefna stöðugleikanum í hættu, kröfurnar kölluðu á hækkun útsvars, minni sveitarfélögin hefðu ekki efni á að borga kennurum laun og fleira í þessum dúr. 

Það  kæmi sér líklega best fyrir Vilhjálm og félaga að þrælahald væri í lög leitt hér aftur.  Þá réðu þeir hvað borgað væri í laun, þeir gætu borgað eins lítið og þeir kærðu sig um og þeir gætu haft vit fyrir þrælunum.   Það er aðeins þegar láglaunastéttirnar krefjast launahækkana að stöðugleikanum og verðbólgunni er stefnt í voða.  Ekki þegar þeir sjálfir skammta sér laun og hlunnindi.  Svo ef láglaunastéttunum tekst að semja bærilega koma þeir betur settu strax á eftir og krefjast enn hærri launa því að það verður að halda bilinu milli hinna betur og verr settu nógu breiðu.  Það sem verst er að hinir ríku og voldugu komast alltaf upp með að stjórna svona, upphefja sjálfa sig og halda hinum niðri.

Vöngum velt:  Af hverju eru leikarar svo oft fengnir til að tilsegja öðrum hvernig þeir eigi að koma fram, haga sér, tjá sig osfrv. þegar framkoma þeirra t.d. í sjónvarpi er stundum svo aulaleg að maður fær hroll.  Þeir eru fyrir framan myndavélarnar með uppglennt augu,  stjarft glott (eða bros), yfirmáta spenntir og taugaóstyrkir, flissandi, hreint út sagt eins og fífl.  Mér flaug þetta svona í hug við lestur auglýsingar frá Capacent þar sem soldið  fræg leikkona á að kenna framkomu og tjáningu.  Þessi tiltekna leikkona er svo sem ekkert dæmi um þetta sem ég era ð segja, hún er reyndar fyrrverandi nemandi minn og ágæt sem slík.  En það eru margir aðrir sem geta alls ekki verið fyrir framan myndavél án þess að (of)leika og fara í aulahlutverk

Útsölur eru auglýstar mikið þessa dagana eins og venjan er að lokinni jólavertíðinni. Ég er hætt að nenna að eltast við útsölur en er þó enn þess sinnis að vilja gera góð kaup.  Sumar verslanir hafa þann sið að kippa nýlegu vörunum afsíðis timabundið en fylla búðina af gömlum lager og bjóða mikinn afslátt af slíkum vörum.  Það er í góðu lagi enda á kúnninn engan rétt á því yfirhöfuð að fá tiltekna vöru á lækkuðu verði.  Og á sama hátt er það í góðu lagi að draga fram gamla draslið og falbjóða það, væntanlega á lágu verði.  Ef enginn vill kaupa draslið á janúarútsölunni má geyma það og setja það á júlí/ágúst útsöluna og svona koll af kolli.  Hins vegar rakst ég inn í búð í Breiðholtinu í gær og þar voru allar vörur á 40 % afslætti,  allt nýlegar vörur frá því í haust eða fyrir jól.  Aðspurð sagði eigandinn að hún þyrfti að rýma fyrir nýjum vörum.  Ég gerði reifarakaup, keypti tvær flíkur sem mig vantaði.